Оҕо - үөрэнээччи буоларыгар биһиги
көмөбүт
Сотору кэминэн сэттэ саастарын туолбут кырачаан оҕолорбут оскуола аанын арыйар түгэннэрэ үүнүө. Оскуолаҕа киириэхтээх оҕо тугу билэр, сатыыр буолуохтааҕый? Бу боппуруос хайа баҕарар оҕо төрөппүттэрин, чугас дьонун долгутар буолуохтаах.
“Оҕо оскуолаҕа киирэригэр психологическай өттүнэн бэлэмнээх буолуута” диэн өйдөбүл баар.
Оҕо бэлэмнээҕин быһаарар түөрт көрүҥ баар.
Бастакытынан, өйдүүр кыаҕын (интеллект) сайдыытын таһыма – болҕомтолоох буолуута, тулалыыр эйгэни ылыныыта (восприятие), өйүгэр тутуута уонна толкуйдуур дьоҕура.
Иккиһинэн, бэйэтин кыана туттуута, кыаҕа (воля) – улахан киһи этэрин истэрэ, быраабыланы тутуһара.
Үсүһүнэн, оҕо тус бэйэтин (личность) уонна оскуолаҕа киирэригэр бэлэмин таһыма – ол эбэтэр оскуолаҕа барыы эрэ диэн буолбакка, үөрэнээччи эбээһинэһин толорорго бэлэмнээх буолуута.
Төрдүһүнэн, көрбүтүн сатаан үтүктэр, уруһуйдуур кыаҕын таһымын (зрительно-моторная координация) сайдыыта.
Оскуолаҕа киирэргэ бэлэмнээх уонна инникитин үчүгэйдик үөрэниэхтээх оҕо бу түөрт көрүҥҥэ сүрүн олуктара баар буолаллара наада. Өскөтө төрөппүттэр оҕону эрдэттэн бэлэмнээбэтэх эбэтэр хайа эрэ түгэҥҥэ көтүппүт да буоллахтарына, саҕалыыр хаһан да хойутаабат. Оҕо 6-7 сааһыгар саҥа информацияны олус дөбөҥнүк ылынар. Кылаабынайа, интэриэһинэйдик уонна тиийимтиэ гына быһаарыахха, өйдөтүөххэ наада.
Бу хайысхаларынан сиэртэрэн биһиги төрөппүттэрибитигэр туһалаах буоллун диэн сүбэ мунньах ыыттыбыт.
Мунньах сыала:
- маҥнайгы кылааска киирэр оҕолор төрөппүттэрин бэйэлэрин бырааптарын уонна эбээһинэстэрин өйдүүргэ үөрэтии;
- оскуолаҕа киирэрэ саастаах оҕо эт-хаан, өй-санаа, билии-көрүү өттүнэн хайдах бэлэмнээх буолуохтааҕын туһунан билһиннэрии.
Мунньаҕы ыытыы көрүҥэ: Квест оонньуу нөҥүө сибээстээн онлайн иһитиннэрэр-анализтыыр бэсиэдэ.
Мунньах кыттыылаахтара: учуутал, оскуолаҕа киириэн иннинээҕи саастаах оҕолор тэрилтэлэрин психолога, эт - хаан өттүнэн иитэн таһаарар физинструктар , бэлэмнэнэр бөлөх иитээччилэрэ уонна төрөппүттэр.
